الميدان ومجزره فض رابعه العدويه

الميدان ومجزره فض رابعه العدويه

الميدان .. دي قصيده كنت كتبتها بعد مجزره فض رابعه العدويه بتكلم فيها بصوره مختصره عن الاحداث من اول ثوره 25 يناير لحد احداث فض رابعه واللي استشهد فيها صديقي الغالي كريم زايد رحمه الله عليه ، وبمناسبه مرور سنه علي رحيله وعلي احداث المجزره هنزل القصيده كلمات وبصوتي :-

( الميدان )

اللي مات غدر وخيانة مات في ايه ؟
اللي شاف ذل ومهانه شافه ليه ؟
صوت مقفول عليه كل البيبان
من قوته كسر البيبان
قرر يبان
خوفه وذله وازمته كانت زمان
هنا في الميدان قال كلمته
ساب هدمته
بيته
حياته
وكونيته
ساب لقمته
زلزل بحور القهر بهمته
صرخه دموع الظلم هزته
صوته الضعيف بقى قوته
كسر البيبان
قرر يبان
هنا في الميدان قال كلمته ..

هنا في الميدان سقط النظام
ايوه حقيقي مش كلام
فرحه واغاني وانسجام
كسرت وشوش الناس الانهزام
رجع الامل يظهر ؟؟
ايوه رجع ، رجع الامل بسلام

هنا في الميدان ، نفس الميدان
مات الكلام
أنزل ، احشد ، وكتر
زلزل ، فوض ، وكبر
أقتل اخوك وابنك
أسجن أبوك وأمك
صاحبك ، قريب دمك
قالو حلال دمك
لترجع تقول حاضر
لنبعد بعيد عنك
لأ مش هقول حاضر
لأ مش هشيل ذنبك
أحسبها من تاني
راجع وشوف عقلك
لأ مش هخاف تاني
لأ مش هخاف منك ..

هنا في الميدان ، غير الميدان
صوت الرصاص زلزل كياني
لخبط ملامحي سكت لساني
بحور الدم جنبي ف مكاني
نظرة عيون الموت
بصرخ بعلو الصوت
رافض أعيش راكع
لأ مش هخاف م الموت
صوب هنا سلاحك
ربي الكريم موجود
دم الشهيد ذنبك
يوم الحساب مشهود
الحق بينا راجع
(( وإن طال بعاده عقود ))

تصنيف : شعر