الرحله مازالت مستمره حتي هذه اللحظه .. انا مازلت منتظر نهايه السباق
( الرحله ..!! )
مكنتش اعرف ان الرحله صعبه اوي كدا ، وبرامجها كتير اوي كدا ، كنت في الاول مش فاهم اي حاجه ،عايش كدا في ملكوت الله بس الغريب ان كل حاجه كنت بحس اني محتاجها بلاقيها ، لو جعت او عطشت الاكل والشرب يجيني وكمان لحد فمي لو مرضت اشوفهم بيجرو عليا ويسهرو بيا لحد ما اخف وابقي كويس , وكل دا وانا رافع ايدي مبعملش اي حاجه ، فعلا هي دي الرحلات ولا بلاش , وبعد شويه اطورت العمليه وبقي في لعب وضحك وهزار وعيشه جميله ، ومش شايل هم اي حاجه غير التنطيط واللعب وبس ، طبعا اتعرفت علي ناس كتير معايا في الرحله فيهم اللي حبتهم وكرهوني وفيهم اللي كرهتهم وحبوني وفيهم اللي حبتهم وحبوني وفيهم اللي كرهتوهم وكرهوني ، رحله بقي وعلي كل لون يابتسته ، واثناء الرحله شوفت بنت جميله ، رقيقه ، هاديه مبتتكلمش ، بس عنيها كلها كلام ومش اي كلام لا ، كلام بكر متسمعش ولا اتقال قبل كدا ، واتمنيت انها لو قررت تتكلم ابقي انا اول حدي يسمعها ، لحد هنا وكانت الرحله راااائعه وكفايه اوي انك مش شايل اي مسؤليه فسح وتنطيط ولعب وضحك وهزار وكمان بنت جميله قدام عنيك .
نقطه ومن اول السطر ..
الرحله معالمها اتغيرت ومحدش كان قالي اني لازم اشارك في تنظيمها ، محدش كان قالي انك في نص الرحله هتبقي عضو فعال ، محدش قالي اني هشيل فيها مسؤليه ، محدش قالي اني هبطل اضحك والعب ، ايه دا؟؟ كمان في سباق اجباري لكل اللي في الرحله ، البقاء فيه للاقوي ، طب الضعيف ؟!!! ( مجهول ) مع انه طالع معانا نفس الرحله.
من بدايه السباق وكل حاجه اتغيرت ، شوفت وشوش غريبه وشوفت وشوش قريبه ، جريت زي زيهم ، حاربت معاهم وضدهم ، عاوز اعيش ، وقالولي شيل نفسك وعيش ، شوفت وسمعت العجب ، صدق وكدب ، حقيقه وسراب ، اخلاص وخيانه ، كره وحب ، عشق وضياع ، نفسك ثم نفسك ، وتمر الرحله وتبقي نفسك ثم من كان لنفسك ، بقيت مش لواحدي البنت الجميله اللي كانت في اول الرحله اتكلمت ، بس مش الكلام اللي كنت متوقع اسمعه ، نفسي ثم نفسي ، ملكي ثم ملكي ، كملنا الرحله مع بعض ومازلنا في السباق واديها في ايديا ، تتضحك لينا الايام ايام وتبكي فينا ايام وايام ، مش قادر اخد نفسي مش قادر اكمل ، تشدني من ايدي لازم تكمل ، انضمو لينا ناس تانيه مسكت في ايدي وفي ايديها والغريب الناس دي جاين فاكرين الرحله ضحك ولعب وهزار ومكنوش عارفين اي حاجه ولا فاهمين اي حاجه سارحين في ملكوت الله لما بيجوعو ويعطشو انا وهي في سباق الرحله ناكلهم ونشربهم ولما يمرضو نسهر عليهم ونداويهم ، الموضوع بقي اصعب بكتير من الاول وكل يوم بيعدي بيبقي اصعب واصعب واصعب واصعب ، الدايره بتكبر والسباق مش عاوز يخلص وناس كتير بتقع وناس كتير بتكمل وناس معندهاش مبدء وناس عايشه للمبدء ، ناس بتجري وهيا مبتسمه وهاديه ، وناس بتجري وعلامات الغضب والاجهاد هلكت ملامحها ، ناس غاليين عليا اوي
في اول الرحله بدور عليهم مش لقيهم (رحلو ) ،وناس خيالهم المريض ملازمني ومش عاوز يفارقني ، ناس ايديها بتتمد في ايدي تساعدني ، وناس بدوس علي رقبتي عشان ينجو ويكسبو ،ناس بتبكي دم ، وناس بتضحك من كتر الهم ، ناس بتتفرج علينا من بعيد ، وناس بتتفرج علينا من قريب ، ناس دورها تنظم اللعبه ، وناس هي نفسها اللعبه ، مش قادر اكمل تعبت عاوز ارجع مش عاوز الرحله دي ، مفيش رجوع مفيش حاجه ، مش عاوز اكمل الرحله ، مش بمزاجك ، انا تعبت مش قادر اجري اكتر من كدا ، دا مش اختيارك ولا بارادتك هتجري وهتكمل غصب عنك لحد ما تقع وتنتهي زيك زي اي حد انتهي وخرج من السباق ( واتنسي )
طب انا عاوز انتهي اعمل ايه ؟؟
مش بايدك ولو عملت كدا بايدك ، هتبقي نهايتك اسود من بدايتك ، كمل
مش قادر .
كمل واحسبها صح عشان تقدر تكسب السباق.
مش قادر انا مبقتش لواحدي في كتير ماسكين في ايدي وانا بجري بيهم.
دا كان باختيارك ، كمل.
الحمل تقيل واللي معايا في الرحله بقو مستعدين يعملو اي حاجه حتي لو دمي المقابل عشان يكسبو .
كل سؤال ليه اجابه ، وانت عارف اجابه كل سؤال .
شوف انت عاوز توصل ازاي واحسبها وكل طريقه ليها ثوابها وعقابها .
مش قادر افكر ولاقادر احسبها .
مش مشكلتي ، دي مشكلتك ، كمل .
مش قادر .
كمل .
مش قادر .
كمل .
مش قادر .
مش قادر .
.
.
.
.
.
ملحوظه ( الرحله مازالت مستمره حتي هذه اللحظه .. انا مازلت منتظر نهايه السباق )
مكنتش اعرف ان الرحله صعبه اوي كدا ، وبرامجها كتير اوي كدا ، كنت في الاول مش فاهم اي حاجه ،عايش كدا في ملكوت الله بس الغريب ان كل حاجه كنت بحس اني محتاجها بلاقيها ، لو جعت او عطشت الاكل والشرب يجيني وكمان لحد فمي لو مرضت اشوفهم بيجرو عليا ويسهرو بيا لحد ما اخف وابقي كويس , وكل دا وانا رافع ايدي مبعملش اي حاجه ، فعلا هي دي الرحلات ولا بلاش , وبعد شويه اطورت العمليه وبقي في لعب وضحك وهزار وعيشه جميله ، ومش شايل هم اي حاجه غير التنطيط واللعب وبس ، طبعا اتعرفت علي ناس كتير معايا في الرحله فيهم اللي حبتهم وكرهوني وفيهم اللي كرهتهم وحبوني وفيهم اللي حبتهم وحبوني وفيهم اللي كرهتوهم وكرهوني ، رحله بقي وعلي كل لون يابتسته ، واثناء الرحله شوفت بنت جميله ، رقيقه ، هاديه مبتتكلمش ، بس عنيها كلها كلام ومش اي كلام لا ، كلام بكر متسمعش ولا اتقال قبل كدا ، واتمنيت انها لو قررت تتكلم ابقي انا اول حدي يسمعها ، لحد هنا وكانت الرحله راااائعه وكفايه اوي انك مش شايل اي مسؤليه فسح وتنطيط ولعب وضحك وهزار وكمان بنت جميله قدام عنيك .
نقطه ومن اول السطر ..
الرحله معالمها اتغيرت ومحدش كان قالي اني لازم اشارك في تنظيمها ، محدش كان قالي انك في نص الرحله هتبقي عضو فعال ، محدش قالي اني هشيل فيها مسؤليه ، محدش قالي اني هبطل اضحك والعب ، ايه دا؟؟ كمان في سباق اجباري لكل اللي في الرحله ، البقاء فيه للاقوي ، طب الضعيف ؟!!! ( مجهول ) مع انه طالع معانا نفس الرحله.
من بدايه السباق وكل حاجه اتغيرت ، شوفت وشوش غريبه وشوفت وشوش قريبه ، جريت زي زيهم ، حاربت معاهم وضدهم ، عاوز اعيش ، وقالولي شيل نفسك وعيش ، شوفت وسمعت العجب ، صدق وكدب ، حقيقه وسراب ، اخلاص وخيانه ، كره وحب ، عشق وضياع ، نفسك ثم نفسك ، وتمر الرحله وتبقي نفسك ثم من كان لنفسك ، بقيت مش لواحدي البنت الجميله اللي كانت في اول الرحله اتكلمت ، بس مش الكلام اللي كنت متوقع اسمعه ، نفسي ثم نفسي ، ملكي ثم ملكي ، كملنا الرحله مع بعض ومازلنا في السباق واديها في ايديا ، تتضحك لينا الايام ايام وتبكي فينا ايام وايام ، مش قادر اخد نفسي مش قادر اكمل ، تشدني من ايدي لازم تكمل ، انضمو لينا ناس تانيه مسكت في ايدي وفي ايديها والغريب الناس دي جاين فاكرين الرحله ضحك ولعب وهزار ومكنوش عارفين اي حاجه ولا فاهمين اي حاجه سارحين في ملكوت الله لما بيجوعو ويعطشو انا وهي في سباق الرحله ناكلهم ونشربهم ولما يمرضو نسهر عليهم ونداويهم ، الموضوع بقي اصعب بكتير من الاول وكل يوم بيعدي بيبقي اصعب واصعب واصعب واصعب ، الدايره بتكبر والسباق مش عاوز يخلص وناس كتير بتقع وناس كتير بتكمل وناس معندهاش مبدء وناس عايشه للمبدء ، ناس بتجري وهيا مبتسمه وهاديه ، وناس بتجري وعلامات الغضب والاجهاد هلكت ملامحها ، ناس غاليين عليا اوي
في اول الرحله بدور عليهم مش لقيهم (رحلو ) ،وناس خيالهم المريض ملازمني ومش عاوز يفارقني ، ناس ايديها بتتمد في ايدي تساعدني ، وناس بدوس علي رقبتي عشان ينجو ويكسبو ،ناس بتبكي دم ، وناس بتضحك من كتر الهم ، ناس بتتفرج علينا من بعيد ، وناس بتتفرج علينا من قريب ، ناس دورها تنظم اللعبه ، وناس هي نفسها اللعبه ، مش قادر اكمل تعبت عاوز ارجع مش عاوز الرحله دي ، مفيش رجوع مفيش حاجه ، مش عاوز اكمل الرحله ، مش بمزاجك ، انا تعبت مش قادر اجري اكتر من كدا ، دا مش اختيارك ولا بارادتك هتجري وهتكمل غصب عنك لحد ما تقع وتنتهي زيك زي اي حد انتهي وخرج من السباق ( واتنسي )
طب انا عاوز انتهي اعمل ايه ؟؟
مش بايدك ولو عملت كدا بايدك ، هتبقي نهايتك اسود من بدايتك ، كمل
مش قادر .
كمل واحسبها صح عشان تقدر تكسب السباق.
مش قادر انا مبقتش لواحدي في كتير ماسكين في ايدي وانا بجري بيهم.
دا كان باختيارك ، كمل.
الحمل تقيل واللي معايا في الرحله بقو مستعدين يعملو اي حاجه حتي لو دمي المقابل عشان يكسبو .
كل سؤال ليه اجابه ، وانت عارف اجابه كل سؤال .
شوف انت عاوز توصل ازاي واحسبها وكل طريقه ليها ثوابها وعقابها .
مش قادر افكر ولاقادر احسبها .
مش مشكلتي ، دي مشكلتك ، كمل .
مش قادر .
كمل .
مش قادر .
كمل .
مش قادر .
مش قادر .
.
.
.
.
.
ملحوظه ( الرحله مازالت مستمره حتي هذه اللحظه .. انا مازلت منتظر نهايه السباق )
0 التعليقات:
إرسال تعليق